بابا گورو نانک دیو جی کے 557ویں جنم دن کی تقریبات کے موقع پر سکھ یاتریوں کی حفاظت کے لیے فول پروف سکیورٹی یقینی بنانے کی ہدایت
اٹک: ریجنل پولیس آفیسر (آر پی او) راولپنڈی ریجن بابر سرفراز الپا نے کمشنر راولپنڈی سلمان غنی کے ہمراہ حسن ابدال میں واقع گوردوارہ سری پنجہ صاحب کا دورہ کیا اور بابا گورو نانک دیو جی کے 557ویں جنم دن کی تقریبات کے سلسلے میں سکیورٹی انتظامات کا جائزہ لیا۔
اس موقع پر ڈی پی او اٹک کیپٹن (ر) علی بن طارق، ڈپٹی کمشنر اٹک مدثر احمد شاہ اور دیگر متعلقہ افسران بھی ان کے ہمراہ موجود تھے۔
دورے کے دوران افسران نے گوردوارے کے داخلی و خارجی راستوں، نگرانی کے نظام اور امن و امان برقرار رکھنے کے لیے کیے گئے مجموعی سکیورٹی انتظامات کا تفصیلی معائنہ کیا۔
اس موقع پر آر پی او بابر سرفراز الپا نے کہا کہ سکھ یاتریوں کو محفوظ اور پُرامن ماحول فراہم کرنا پنجاب پولیس کی اولین ترجیحات میں شامل ہے۔ انہوں نے یقین دہانی کرائی کہ تقریبات کے دوران فول پروف سکیورٹی انتظامات یقینی بنائے جائیں گے۔
انہوں نے مزید کہا کہ امن و امان میں خلل ڈالنے کی کوشش کرنے والے عناصر کے خلاف سخت قانونی کارروائی عمل میں لائی جائے گی۔
حکام کے اس دورے کا مقصد مذہبی تقریبات کے لیے سکیورٹی تیاریوں کا جائزہ لینا اور گوردوارہ سری پنجہ صاحب آنے والے سکھ یاتریوں کے تحفظ کو یقینی بنانا تھا۔




