سڈنی: سابق آسٹریلوی کرکٹر ڈیوڈ وارنر کو شراب پی کر گاڑی چلانے کے جرم میں سڈنی کی عدالت نے 1500 آسٹریلوی ڈالر جرمانہ کردیا۔ 39 سالہ سابق اوپنر نے عدالت میں جرم قبول کرلیا، جس کے بعد انہیں سزا سنائی گئی۔
ڈیوڈ وارنر کو رواں سال اپریل میں گرفتار کیا گیا تھا۔ عدالت کو بتایا گیا کہ ایسٹر کے موقع پر ایک سماجی تقریب میں شرکت کے بعد وہ اپنے خاندان کو سڈنی کے مشرقی علاقے میں گھر لے جا رہے تھے، جب انہیں سڑک پر الکوحل ٹیسٹنگ کے لیے روکا گیا۔
عدالت کے مطابق وارنر کے خون میں الکوحل کی مقدار مقررہ قانونی حد سے دو گنا سے بھی زیادہ تھی۔ وارنر نے ٹیسٹنگ پوائنٹ دیکھنے کے بعد گاڑی روکی اور مبینہ طور پر ایک خاتون مسافر کے ساتھ نشست تبدیل کرنے کی کوشش کی۔
ویورلے لوکل کورٹ میں سماعت کے دوران جج کلیئر فارنان نے کہا کہ انہیں توقع ہے کہ وارنر دوبارہ اس جرم کا ارتکاب نہیں کریں گے، تاہم انہوں نے واضح کیا کہ شراب پی کر گاڑی چلانا نیو ساؤتھ ویلز میں ہونے والے متعدد ٹریفک حادثات کی ایک اہم وجہ ہے۔
جج نے اس بات کو بھی جرم کی سنگینی میں اضافے کا باعث قرار دیا کہ واقعے کے وقت گاڑی میں بچے موجود تھے۔ عدالت نے جرمانے کے علاوہ وارنر کی گاڑی میں الکوحل انٹرلاک ڈیوائس نصب کرنے کا بھی حکم دیا ہے۔
یہ ڈیوائس ڈرائیور کے جسم میں الکوحل کی موجودگی کا پتہ لگانے کے بعد گاڑی کو اسٹارٹ ہونے سے روک دیتی ہے۔ اس اقدام کا مقصد وارنر کو مستقبل میں شراب نوشی کے بعد گاڑی چلانے سے روکنا ہے۔
وارنر کے وکیل اویس احمد نے عدالت سے درخواست کی تھی کہ ان کے مؤکل کو باقاعدہ سزا سنانے سے گریز کیا جائے۔ وکیل نے مؤقف اختیار کیا کہ میڈیا کوریج کے باعث وارنر کو پہلے ہی اضافی نقصان اٹھانا پڑا ہے اور ان کے تجارتی مواقع بھی متاثر ہوئے ہیں۔
عدالتی فیصلے کے بعد ڈیوڈ وارنر صحافیوں سے بات کیے بغیر عدالت سے روانہ ہوگئے۔ ان کی مینجمنٹ نے بھی فوری طور پر واقعے پر کوئی تبصرہ نہیں کیا۔
انٹرنیشنل کرکٹ سے ریٹائرمنٹ کے باوجود وارنر آسٹریلوی کرکٹ سے وابستہ ہیں۔ وہ فوکس اسپورٹس آسٹریلیا کے لیے کرکٹ کمنٹری کرتے ہیں اور حال ہی میں ڈارون میں آسٹریلیا اور بنگلہ دیش کے درمیان ٹیسٹ میچ کی کوریج کرنے والی ٹیم کا حصہ تھے۔
وارنر بگ بیش لیگ کی ٹیم سڈنی تھنڈر کے کپتان بھی ہیں۔ دلچسپ بات یہ ہے کہ سڈنی تھنڈر نیو ساؤتھ ویلز حکومت کی شراب پی کر ڈرائیونگ کی حوصلہ شکنی کرنے والی مہم کا بھی حصہ ہے۔
کرکٹ نیو ساؤتھ ویلز نے فوری طور پر یہ واضح نہیں کیا کہ اس واقعے کا سڈنی تھنڈر کی کپتانی پر کیا اثر پڑے گا۔ تاہم ادارے نے کہا کہ وہ محفوظ ڈرائیونگ کا بھرپور حامی ہے اور شراب پی کر ڈرائیونگ کے واقعے کو سنجیدگی سے لے رہا ہے۔
ڈیوڈ وارنر آسٹریلیا کے کامیاب ترین جدید بلے بازوں میں شمار ہوتے ہیں۔ انہوں نے آسٹریلیا کی جانب سے 112 ٹیسٹ میچز اور 250 سے زائد محدود اوورز کے بین الاقوامی میچز کھیلے اور کئی برس تک ٹیم کے اہم اوپننگ بلے باز رہے۔
شراب پی کر ڈرائیونگ کے جرم میں عدالتی سزا وارنر کے ریٹائرمنٹ کے بعد کے کیریئر کے لیے ایک اہم قانونی دھچکا ہے، تاہم وہ کمنٹری اور ڈومیسٹک کرکٹ کے ذریعے آسٹریلوی کرکٹ سے بدستور منسلک ہیں۔
