اسلام آباد: وزیراعظم شہباز شریف آج شام دو روزہ سرکاری دورے پر سعودی عرب روانہ ہوں گے، جہاں وہ ایک اعلیٰ سطحی وفد کے ہمراہ سعودی قیادت سے اہم ملاقاتیں کریں گے۔ ذرائع کے مطابق اس دورے کا مقصد پاکستان اور سعودی عرب کے درمیان دوطرفہ تعلقات کو مزید مضبوط بنانا اور خطے کی تازہ صورتحال پر تبادلہ خیال کرنا ہے۔
ذرائع کے مطابق وزیراعظم شہباز شریف اپنے دورۂ سعودی عرب کے دوران سعودی ولی عہد اور وزیراعظم شہزادہ محمد بن سلمان سے اہم ملاقات کریں گے۔ ملاقات میں دونوں رہنما پاک۔سعودی تعلقات، اقتصادی تعاون، سرمایہ کاری، توانائی، دفاعی شراکت داری اور باہمی دلچسپی کے دیگر امور پر تفصیلی گفتگو کریں گے۔
ملاقات کے دوران مشرقِ وسطیٰ کی بدلتی ہوئی صورتحال بھی ایجنڈے کا اہم حصہ ہوگی۔ ذرائع کا کہنا ہے کہ وزیراعظم شہباز شریف اور ولی عہد محمد بن سلمان ایران اور امریکا کے درمیان جاری کشیدگی، خطے میں امن و استحکام، اور سفارتی کوششوں کو فروغ دینے سے متعلق امور پر بھی تبادلۂ خیال کریں گے۔
پاکستان حالیہ مہینوں میں خطے میں کشیدگی کم کرنے اور تنازعات کے پرامن حل کے لیے مسلسل سفارتی رابطے جاری رکھے ہوئے ہے۔ حکومت کا مؤقف ہے کہ مسائل کا حل مذاکرات اور سفارت کاری کے ذریعے تلاش کیا جانا چاہیے تاکہ خطے میں مزید عدم استحکام سے بچا جا سکے۔
یہ دورہ ایسے وقت میں ہو رہا ہے جب پاکستان اور سعودی عرب کے درمیان سیاسی، اقتصادی، دفاعی اور سیکیورٹی تعاون مزید فروغ پا رہا ہے۔ سعودی عرب پاکستان کا قریبی دوست اور اہم شراکت دار ہے، جبکہ دونوں ممالک مختلف شعبوں میں باہمی تعاون کو مزید وسعت دینے کے خواہاں ہیں۔
یہ دورہ وزیراعظم شہباز شریف اور سعودی ولی عہد شہزادہ محمد بن سلمان کے درمیان حالیہ ٹیلیفونک رابطے کے بعد ہو رہا ہے، جس میں وزیراعظم نے سعودی عرب کی سلامتی، خودمختاری، علاقائی سالمیت اور خوشحالی کے لیے پاکستان کی غیرمتزلزل حمایت کا اعادہ کیا تھا۔
ٹیلیفونک گفتگو کے دوران وزیراعظم نے بحیرہ احمر میں حوثی ملیشیا کی جانب سے سعودی آئل ٹینکرز پر حملوں کی شدید الفاظ میں مذمت کرتے ہوئے انہیں بین الاقوامی قوانین کی خلاف ورزی قرار دیا تھا۔ انہوں نے کہا تھا کہ ایسے حملے نہ صرف عالمی بحری تجارت اور جہاز رانی کی آزادی کے لیے خطرہ ہیں بلکہ پورے خطے کے امن اور استحکام کو بھی متاثر کرتے ہیں۔
وزیراعظم شہباز شریف نے اس موقع پر اس عزم کا بھی اعادہ کیا تھا کہ وہ، فیلڈ مارشل سید عاصم منیر اور پوری پاکستانی قوم مشکل وقت میں سعودی قیادت اور برادر عوام کے ساتھ مکمل یکجہتی کے ساتھ کھڑے ہیں۔
تجزیہ کاروں کے مطابق وزیراعظم کا یہ دورہ پاک۔سعودی اسٹریٹجک شراکت داری کو مزید مستحکم کرنے، سرمایہ کاری اور اقتصادی تعاون کو فروغ دینے، اور خطے کو درپیش سیکیورٹی چیلنجز پر مشترکہ حکمت عملی اختیار کرنے میں اہم کردار ادا کرے گا۔