راولپنڈی: کینیڈا کی وزیر خارجہ انیتا آنند نے پیر کے روز آرمی چیف فیلڈ مارشل سید عاصم منیر سے جنرل ہیڈکوارٹرز (جی ایچ کیو) راولپنڈی میں ملاقات کے دوران عالمی امن و استحکام کے لیے پاکستان کی مسلسل کوششوں اور دہشت گردی کے خلاف جنگ میں دی جانے والی عظیم قربانیوں کو خراجِ تحسین پیش کیا۔
پاک فوج کے شعبہ تعلقات عامہ (آئی ایس پی آر) کے مطابق ملاقات میں دونوں رہنماؤں نے باہمی دلچسپی کے امور، علاقائی سکیورٹی کی صورتحال، دفاعی تعاون اور دوطرفہ تعلقات کے فروغ پر تفصیلی تبادلہ خیال کیا۔
آئی ایس پی آر کے بیان کے مطابق کینیڈین وزیر خارجہ نے خطے میں امن و استحکام کے لیے پاکستان کے تعمیری کردار کو سراہتے ہوئے دہشت گردی کے خلاف جنگ میں پاکستانی عوام اور سکیورٹی فورسز کی بے مثال قربانیوں کا اعتراف کیا۔
ملاقات کے دوران فریقین نے پاکستان اور کینیڈا کے درمیان دفاعی تعاون، سکیورٹی روابط اور مختلف شعبوں میں باہمی شراکت داری کو مزید مضبوط بنانے کے عزم کا بھی اظہار کیا۔
آرمی چیف فیلڈ مارشل سید عاصم منیر نے کینیڈا کے ساتھ دوستانہ تعلقات کو اہم قرار دیتے ہوئے باہمی احترام، مشترکہ مفادات اور تعاون پر مبنی تعلقات کو مزید فروغ دینے کی ضرورت پر زور دیا۔
بیان کے مطابق ملاقات خوشگوار ماحول میں ہوئی، جس میں دونوں ممالک کے درمیان مختلف شعبوں میں تعاون بڑھانے اور علاقائی امن و سلامتی کے لیے مشترکہ کوششیں جاری رکھنے پر اتفاق کیا گیا۔