(Publish from Houston Texas USA)
(میاں افتخار احمد)
جھنگ میں 62 ویٹرنری افسران میں موٹر سائیکلوں کی تقسیم، دور دراز علاقوں تک بروقت سہولیات کی فراہمی ممکن
فیصل آباد: وزیراعلیٰ پنجاب مریم نواز شریف کے ویژن کے مطابق محکمہ لائیوسٹاک پنجاب فیلڈ سروس ڈلیوری کو مؤثر، تیز رفتار اور جدید تقاضوں کے عین مطابق بنانے کے لئے مسلسل عملی اقدامات کر رہا ہے۔ اسی سلسلے میں RCCIB جھنگ میں ویٹرنری اسٹاف میں موٹر سائیکلز کی تقسیم کی تقریب منعقد ہوئی، جس کا افتتاح ڈپٹی کمشنر جھنگ علی اکبر بھنڈر نے کیا۔
تقریب میں معزز مہمانانِ گرامی کی شرکت نے پروگرام کے وقار میں اضافہ کیا جن میں ایڈیشنل ڈپٹی کمشنر جنرل جھنگ عامر محمود، سابق صوبائی وزیر مہر اسلم بھروانہ، سابق مشیر وزیراعلیٰ نواب فیصل حیات خان جبوآنہ، سابق ایم پی اے راشدہ یعقوب شیخ، مسلم لیگ (ن) کے رہنما خان امیر عباس سیال، ڈائریکٹر RCCIB عاصم توصیف، ایڈیشنل ڈائریکٹر لائیوسٹاک ڈاکٹر محمد عبدالجبار، ڈپٹی ڈائریکٹر ڈاکٹر محمد سیف اللہ اور دیگر شامل تھے۔
تقریب میں ضلع جھنگ کے 62 ویٹرنری آفیسرز میں موٹر سائیکلز تقسیم کی گئیں جو بلا سود آسان اقساط پر فراہم کی جا رہی ہیں۔ اس اقدام کا مقصد فیلڈ میں نقل و حرکت کو بہتر بنانا، دور دراز دیہی علاقوں تک بروقت رسائی یقینی بنانا اور ویٹرنری خدمات کے مجموعی معیار کو مزید بہتر کرنا ہے۔ یہ پروگرام محکمہ لائیوسٹاک پنجاب کی اس پالیسی کا حصہ ہے جس کے تحت عوام کو ان کی دہلیز پر معیاری اور بروقت ویٹرنری سہولیات فراہم کرنے کے لیے انفراسٹرکچر اور فیلڈ سپورٹ کو مضبوط بنایا جا رہا ہے۔
