منڈی بہاؤالدین میں انسدادِ گداگری مہم پر اہم اجلاس — آگاہی سیشنز اور عملی اقدامات کا فیصلہ

(Publish from Houston Texas USA)

(راجہ محمد ایوب بیورو چیف منڈی بہاؤالدین )

صوبائی سیکرٹری سوشل ویلفیئر اینڈ بیت المال پنجاب کی ہدایت پر ڈپٹی ڈائریکٹر سوشل ویلفیئر عاطف علی وڑائچ کی زیر صدارت انسداد گداگری مہم کے حوالے سے ڈی سی آفس میں اجلاس منعقد ہوا۔ اجلاس میں ڈپٹی ڈائریکٹر کالجز محمد فاروق پھپھرا، ڈی ایس پی ٹریفک راشد بشیر کٹھانہ، ڈسٹرکٹ ایجوکیشن آفیسر عاکف ندیم سمیت مختلف این جی اوز کے نمائندوں نے شرکت کی۔ اجلاس میں ضلع منڈی بہاؤالدین میں تین ماہ کے دوران گداگری کے خلاف اقدامات کا تفصیلی جائزہ لیا گیا۔ اجلاس میں فیصلہ کیا گیا کہ انسداد گداگری کے حوالے سے ضلع کی تینوں تحصلیوں کے کالجز اور سکولز میں آگاہی سیشنز منعقد کئے جائیں گے ، پبلک مقامات اور معروف شاہراہوں پر آگاہی بینرز آویزاں کئے جائیں گے اور عوام الناس میں آگاہی کیلئے پمفلٹس بھی تقسیم کئے جائیں گے۔ ڈپٹی ڈائریکٹر سوشل ویلفیئر عاطف علی وڑائچ کا کہنا تھا کہ گداگری ایک سماجی بیماری ہے ، جو قوم کی ترقی میں رکاوٹ کا سبب بنتی ہے اور محنت کی جگی سستی کو فروغ دیتی ہے۔ ڈپٹی ڈائریکٹر کا کہنا تھا کہ سڑکوں، بازاروں اور ٹریفک سگنلز پر مجبور افراد کو پیسے دینا مسئلے کا حل نہیں بلکہ یہ مسائل کو بڑھاتا ہے ۔ان کا کہنا تھا کہ حکومت پنجاب خواتین اور بچوں کو ہنر مند بنا کر روزگار کی فراہمی کیلئے بھر پور اقدامات کر رہی ہے۔ تعلیم ، ہنر اور روزگار ہی گداگری کا موثر حل ہیں اور گداگری کا خاتمہ صرف حکومتی نہیں عوامی شعور سے ہی ممکن ہے لہذا گداگری کے خاتمے کیلئے ہم سب مل کر اپنا کردار ادا کریں تو گداگری میں نمایاں حد تک کمی لائی جا سکتی ہے اور اہم اپنے معاشرے کو مثالی شکل دے سکتے ہیں