(Publish from Houston Texas USA)
(راجہ محمد ایوب/بیورو چیف منڈی بہاؤالدین)
ایڈیشنل ڈپٹی کمشنر ریونیو منڈی بہاؤالدین محمد جعفر چوہدری کی زیر صدارت صارفین کے حقوق کے تحفظ کے حوالے سے ضلعی صارف تحفظ کونسل کا اجلاس ڈی سی آفس میں منعقد ہوا۔ اجلاس میں اسسٹنٹ ڈائریکٹر ( لیگل ) ضلعی صارف تحفظ کونسل شہلا مبین، ڈی ایس پی لیگل چوہدری غضنفر حیات تلہ، سینئر ممبر ڈی سی پی سی راجہ محمد ایوب، سینئر اسسٹنٹ کامران نقوی ، لالہ محمد اعظم، میڈم نادیہ بٹ، میڈم نورین ناز ، میڈم صاعقہ نورین سمیت ممبران ڈسٹرکٹ کنزیومر پروٹیکشن کونسل نے شرکت کی۔ اجلاس میں ضلعی صارف تحفظ کونسل ایکٹ پر عملدرآمداور کئے گئے اقدامات سمیت مختلف تجاویز اور مسائل پر غور و خوض کیا گیا۔ اجلاس میں گزشتہ اجلاس میں کئے گئے فیصلوں پر ابتک کی پیشرفت کے حوالے سے بھی گفت و شنید ہوئی۔ اسسٹنٹ ڈائریکٹر شہلا مبین نے اجلاس کو پنجاب کنزیومر پروٹیکشن ایکٹ کے حوالے سے تفصیلی بریفنگ دیتے ہوئے بتایا کہ صارفین کے حقوق کے تحفظ کے لیے ڈسٹرکٹ کنزیومر پروٹیکشن کونسل بہترین اقدامات اٹھا رہی ہے۔ دکانداران کیلئے لازم ہے کہ وہ اپنی دکانوں پر پرائس لسٹ آویزاں کریں، رسید جاری کریں، بیچی جانے والی اشیاءکی ترکیب و ترتیب واضح ہو اور تاریخ تیاری اور تاریخ اختتام کے بغیر کوئی بھی چیز فروخت نہ کریں اور اشیاءکے لین دین پر صارفین کے ساتھ لڑائی جھگڑا نہ کریں ورنہ ان کے خلاف پنجاب کنزیومر پروٹیکشن 2025 ء کے تحت قانونی کارروائی ہو گی۔ جس پرایڈیشنل ڈپٹی کمشنر ریونیو چوہدری محمد جعفر کا کہنا تھا کہ صارف کے حقوق کاتحفظ حکومت پنجاب کی اولین ترجیح ہے۔ انہوں نے اسسٹنٹ ڈائریکٹر ( لیگل ) کو ہدایت کی کہ وہ عوام الناس میں آگاہی پیدا کرنے کیلئے مذید اقدامات کریں۔ ایڈیشنل ڈپٹی کمشنر نے صارفین سے اپیل کی کہ وہ اپنے حقوق کے تحفط کیلئے خریدی گئی اشیاء کی رسید لازمی حاصل کریں اور زائد المیعاد اشیاء فروخت کرنے والوں اور ناقص خدمات کی فراہمی کرنے والوں کے خلاف ضلعی صارف تحفظ کونسل سے رجوع کریں تا کہ ان کی مکمل داد رسی کی جا سکے۔
