(Publish from Houston Texas USA)
(راجہ محمد ایوب بیورو چیف منڈی بہاؤالدین)
ایڈیشنل ڈپٹی کمشنر جنرل منڈی بہاؤالدین راجہ حیدر عباس نے ڈسٹرکٹ ہیڈکوارٹر ہسپتال میں پانچ سال تک کے بچوں کو پولیو ویکسین کے قطرے پلا کر چار روزہ انسداد پولیو مہم کا شاندارافتتاح کیا اور مہم کی کامیابی کیلئے دعا بھی کی۔اس موقع پر چیف ایگزیکٹو آفیسرہیلتھ ڈاکٹر کرن ارشد، ڈسٹرکٹ ہیلتھ آفیسر ڈاکٹر محمد افتخار، پرسنل سٹاف آفیسر ٹو سی ای او ہیلتھ فیصل نذیر،فوکل پرسنز برائے ای پی آئی رانا جاوید، محمد ہارون شہزاد، راجہ حمزہ ایوب اور دیگربھی موجود تھے۔ اس موقع پر ایڈیشنل ڈپٹی کمشنر راجہ حیدر عباس کا کہنا تھا کہ 15دسمبر سے 18دسمبر 2025تک جاری رہنے والی چار روزہ انسداد پولیو مہم کے دوران محکمہ ہیلتھ کی ٹیمیں گھر گھر جا کرپانچ سال تک کے 3 لاکھ 24 ہزار 622 بچوں کو پولیو ویکسین کے قطرے پلائیں گی۔ پولیو مہم کے لئے محکمہ صحت کے 2917 ورکرز پر مشتمل 70 فکسڈ ٹیمیں،45 ٹرانزٹ پوائنٹس ٹیمیں، گھر گھر جانے والی1225 ٹیمیں، 70 یوسی ایم اوز جبکہ 242 ایریا انچارجز مقرر کئے گئے ہیں۔ایڈیشنل ڈپٹی کمشنر راجہ حیدر عباس کا کہنا تھا کہ عملی اقدامات سے ہی پولیو کا خاتمہ ممکن ہے۔ پولیو کے خاتمے کیلئے ضروری ہے کہ ہم بحیثیت قوم اپنا مثبت کردار ادا کریں،اپنے بچوں کو ہر بار پولیو کے قطرے لازمی پلوا ئیںتا کہ ہم اپنی آنے والی نسلوں کو اس خطرناک اور موذی مرض سے محفوظ رکھ سکیں۔ انہوں نے ڈی ایچ اوز کو ہدایت کی کہ وہ انسداد پولیو مہم کے دوران ٹیموں کی کارکردگی کی خود مانیٹرنگ کریں اور قطرے پلانے والی ٹیموں کی روزانہ کی بنیاد پر سکریننگ کی جائے اور کسی بھی فیک انٹریز سے اجتناب کیا جائے
