(Publish from Houston Texas USA)
(میاں افتخار احمد)
فیصل آباد: ڈپٹی کمشنر کیپٹن (ر) ندیم ناصر کی زیر صدارت ”ستھرا پنجاب“ پروگرام کے تحت ایک اہم اجلاس منعقد ہوا جس میں ایڈیشنل ڈپٹی کمشنر ہیڈ کوارٹر، اسسٹنٹ کمشنرز، ایف ڈبلیو ایم سی اور دیگر متعلقہ محکموں کے افسران نے شرکت کی۔
اجلاس میں ڈپٹی کمشنر نے واضح ہدایات دیتے ہوئے کہا کہ شہر میں صفائی آپریشن کسی بھی صورت سست نہیں ہونا چاہیے۔ انہوں نے فوری طور پر شکایات مانیٹرنگ سسٹم کو کنٹرول روم میں منتقل کرنے کا حکم دیتے ہوئے ہدایت کی کہ فیلڈ رپورٹس، ڈیٹا اپ لوڈنگ اور صفائی کے عمل کی روزانہ بنیادوں پر سخت مانیٹرنگ کی جائے۔
ڈپٹی کمشنر نے اسسٹنٹ کمشنرز کو جنک سائیٹس کا معائنہ کرنے اور فوری وزٹس یقینی بنانے کی ہدایت کی۔ انہوں نے کہا کہ شہر میں کسی بھی مقام پر کوڑے کے ڈھیر کی موجودگی ناقابلِ قبول ہے، لہٰذا تمام متعلقہ عملہ روزانہ کی بنیاد پر تصاویر پورٹل پر اپ لوڈ کرے۔
انہوں نے کہا کہ فیصل آباد کو صاف ستھرا رکھنا ضلعی انتظامیہ کی اولین ترجیح ہے اور صفائی کے معاملے میں کسی قسم کی کوتاہی یا غفلت برداشت نہیں کی جائے گی۔ ڈپٹی کمشنر نے ایف ڈبلیو ایم سی اور اسسٹنٹ کمشنرز کو صفائی آپریشن مزید تیز کرنے کے احکامات بھی جاری کیے۔
آخر میں ڈپٹی کمشنر نے کہا کہ شہریوں کو بہتر، صحت مند اور صاف ماحول فراہم کرنے کے لیے تمام محکمے اپنی ذمہ داریاں پوری سنجیدگی اور توانائی کے ساتھ ادا کریں۔
