(Publish from Houston Texas USA)
(راجہ محمد ایوب بیورو چیف منڈی بہاؤالدین)
ڈپٹی پراجیکٹ ڈائریکٹر پنجاب ہیلتھ اینڈ پاپولیشن ڈیپارٹمنٹ لاہور ڈاکٹر عمر اعوان نے سپرنٹنڈنٹ جیل حق نواز اور چیف ایگزیکٹو آفیسر ہیلتھ ڈاکٹر کرن ارشد کے ہمراہ ڈسٹرکٹ جیل منڈی بہاؤالدین کا دورہ کیا ۔انھوں نے جیل کی مختلف بیرکس ، چکیوں ، لنگر خانے،نوعمر وارڈ اور ڈسپنسری کا معائنہ کیااور جیل ہسپتال میں داخل مریضوں کی تیمارداری بھی کی ۔انھوں نے جیل انتظامیہ کو ان بیمار قیدیوں کے بہتر ین علاج معالجہ کی ہدایات جاری کیں۔اس موقع پر ڈپٹی سپرنٹنڈنٹ جیل شیخ عارف نثار ، ڈپٹی سپرنٹنڈنٹ نارووال شہزاد اسلم ججہ ، پی اے ٹو سی ای او فیصل نذیر ، راجہ حمزہ ایوب اور دیگر بھی شریک تھے ، ڈاکٹر عمر اعوان نے ” ہنر مند اسیران پروگرام “کے تحت جیل کےاندر قیدیوں کو ہنر مند بنانے کے لئے شروع کئے گئے مختلف پروگرامز کپڑوں کی سلائی ،ائیر کنڈیشنر ، موٹر سائیکل مکینک کورس اور بجلی کے بلب بنانے کے یونٹ کا دورہ کیا اور قیدیوں کو کام کرتے ہوئے دیکھ کر خوشی کا اظہار کیا ۔ انھوں نے جیل کے اندر بڑے لنگر خانے کا بھی معائنہ کیا اور صفائی ستھرائی اور اشیائے خوردونوش کا جائزہ لیا ۔ڈاکٹر عمر اعوان نے جیل میں صفائی ستھرائی کے بہترین انتظامات اور حفظان صحت کے اصولوں کے عین مطابق جیل اسیران کو کھانا فراہم کرنے پر سپرنٹنڈنٹ جیل حق نواز کی کاوشوں کو سراہا اور جیل کی وزیٹر بک میں ان کے کام کی زبردست تعریف کی –
