(راجہ محمد ایوب/بیورو چیف منڈی بہاؤالدین)
ڈپٹی کمشنر / چیئرپرسن ڈسٹرکٹ کنزیومر پروٹیکشن کونسل ڈاکٹر فیصل سلیم کی ہدایت پر ضلع منڈی بہاؤالدین میں صارفین کی آگاہی مہم کو تیز کر دیا گیا ہے۔ اسسٹنٹ ڈائریکٹر لیگل کنزیومر پروٹیکشن کونسل شہلا مبین کی زیر صدارت گورنمنٹ گرلز ہائی سکول پھالیہ میں آگاہی سیمینار کا انعقاد کیا گیا۔ جس میں سکول ہیڈ مسٹریس سمیت ممبران ضلعی صارف تحفظ کونسل نادیہ بٹ، محمد اسلم ، سینئر اسسٹنٹ ڈی سی پی سی کامران نقوی،اساتذہ اور طالبات کی کثیر تعداد نے شرکت کی۔ اسسٹنٹ ڈائریکٹر لیگل ڈسٹرکٹ کنزیومر پروٹیکشن کونسل شہلا مبین نے سیمینار سے خطاب کرتے ہوئے صارف تحفظ ایکٹ پر تفصیلی روشنی ڈالی اور شرکاء کو بطور صارف ان کے حقوق اور حقوق کے تحفظ کے بارے میں تفصیلی آگاہ کیا۔ اسسٹنٹ ڈائریکٹر کا کہنا تھا کہ ڈسٹرکٹ کنزیومر پروٹیکشن کونسل منڈی بہاءالدین عوام کے بطور صارف حقوق کے تحفظ کے لیے ہمہ وقت کوشاں ہے اور اس حوالے سے کالجز اور سکولز میں آگاہی سیمینار منعقد کئے جا رہے ہیں جبکہ شہر کی معروف شاہراہوں پر بینرز آویزاں کرنے کے ساتھ آگاہی پمفلٹس بھی تقسیم کئے جا رہے ہیں۔ انہوں نے واضح کیا کہ صارفین بھی ذمہ داری کا مظاہرہ کرتے ہوئے اشیاء کی خریداری کے دوران تیاری اور میعاد ختم تاریخ، پرائس لسٹ، اجزاۓ ترکیبی اور رسید کی بابت دریافت کریں۔ دوران خریداری اگر دکاندار آپ کو رسید جاری نہیں کرتا، بیچنے والی اشیاء کے اجزاۓ ترکیبی سے آگاہ نہیں کرتا، تیاری اور میعاد اختتام اور قیمتیں واضح طور پر اپنی دکان پر آویزاں نہیں کرتا تو آپ ڈسٹرکٹ کنزیومر پروٹیکشن کونسل سے رجوع کر کے اپنی شکایات کا اندراج کروا سکتے ہیں۔ اتھارٹی شکایت ثابت ہونے پر ایک ہزار روپے سے ایک لاکھ روپے تک جرمانہ کرسکتی ہے۔
