(Publish from Houston Texas USA)
(میاں افتخار احمد)
تشدد کا شکار خواتین کو فوری مدد اور انصاف کی فراہمی کے لیے اداروں کے مابین رابطہ کاری مضبوط بنانے پر اتفاق
فیصل آباد: پولیس خدمت مرکز فیصل آباد میں خواتین کو تشدد سے تحفظ فراہم کرنے والے فرنٹ لائن پولیس افسران کے ساتھ ایک اہم آگاہی اجلاس منعقد ہوا جس کا بنیادی مقصد متعلقہ اداروں کے درمیان رابطہ کاری کو مزید مؤثر بنانا اور خواتین کے حقوق و تحفظ سے متعلق قوانین کی آگاہی میں اضافہ کرنا تھا۔ اجلاس میں ڈسٹرکٹ ویمن پروٹیکشن آفیسر کنول شہزادی، ویمن پروٹیکشن آفیسر مسز صنم زہرہ، لاء آفیسر زاہد علی شاکر، انچارج تحفظ مرکز گلناز خالد، ایس ایچ او ویمن پولیس اسٹیشن مدیحہ ارشاد، انچارج خدمت مرکز سید منیب گیلانی سمیت دیگر افسران نے شرکت کی۔ کنول شہزادی نے شرکاء کو پنجاب پروٹیکشن آف ویمن اگینسٹ وائلنس ایکٹ 2016ء کے اہم نکات پر تفصیلی بریفنگ دی اور تشدد کا شکار خواتین کو فوری معاونت فراہم کرنے کے موجودہ طریقہ کار، پولیس خدمت مرکز کے کردار اور قانون کی اہم شقوں سے آگاہ کیا۔ اجلاس میں اس بات پر زور دیا گیا کہ فرنٹ لائن پولیس سٹاف کے باہمی تعاون اور مربوط کوششیں تشدد سے متاثرہ خواتین کو بروقت مدد، تحفظ اور انصاف دلانے میں مرکزی حیثیت رکھتی ہیں۔ شرکاء نے اس اقدام کو سراہتے ہوئے فیصل آباد میں خواتین کے تحفظ کے لیے مزید مؤثر اقدامات جاری رکھنے کے عزم کا اظہار کیا۔
